- Thursday, November 28, 2024
- A biweekly newspaper published from philadelphia , pa.
ന്യൂഡൽഹി: ദേശീയ ചലച്ചിത്ര പുരസ്കാര നിറവിൽ നിറഞ്ഞനിന്ന മലയാളത്തിന് മികച്ച അഭിനേതാക്കൾക്കുള്ള പുരസ്കാരം കൈയെത്തും ദൂരത്ത് നഷ്ടമായി. മോം എന്ന ചിത്രത്തിലെ മനോഹര പ്രകടനത്തിന് അന്തരിച്ച നടി ശ്രീദേവിക്കാണ് മികച്ച നടിക്കുള്ള പുരസ്കാരം ലഭിച്ചത്. നഗരകീർത്തനം എന്ന ബംഗാളി ചിത്രത്തിലെ പ്രകടനത്തിന് പത്തൊൻപത് വയസുകാരൻ ഋഥി സെൻ ആണ് രാജ്യത്തെ ഏറ്റവും മികച്ച അഭിനേതാവായി തെരഞ്ഞെടുക്കപ്പെട്ടത്.
ഈ രണ്ടു വിഭാഗത്തിലേക്കും മലയാളി താരങ്ങൾ ശക്തമായ മത്സരം കാഴ്ചവച്ചെങ്കിലും അവസാന നിമിഷം ഒഴിവാക്കപ്പെടുകയായിരുന്നു. മികച്ച നടനുള്ള പുരസ്കാരത്തിന് ഇന്ദ്രൻസിനെ അവസാന നിമിഷം വരെ പരിഗണിച്ചിരുന്നുവെന്ന് ജൂറി ചെയർമാൻ ശേഖർ കപൂർ പറഞ്ഞു. ആളൊരുക്കം എന്ന ചിത്രത്തിലെ ഇന്ദ്രൻസിന്‍റെ അഭിനയം ഗംഭീരമായിരുന്നുവെന്നും ജൂറി വിലയിരുത്തി.
ടേക്ക് ഓഫിലെ ഗംഭീര പ്രകടനത്തിന് പാർവതിയെയും ജൂറി അഭിനന്ദിച്ചു. മികച്ച പ്രകടനമെന്ന് വിലയിരുത്തിയാണ് ജൂറിയുടെ പ്രത്യേക പരാമർശം പാർവതിക്ക് നൽകാൻ തീരുമാനിച്ചതെന്നും ജൂറി ചെയർമാൻ പറഞ്ഞു.
വില്ലേജ് റോക്ക് സ്റ്റാർ എന്ന ആസാമീസ് ചിത്രമാണ് പോയ വർഷത്തെ മികച്ച ചിത്രമായി തെരഞ്ഞെടുക്കപ്പെട്ടത്. റിമ ദാസ് ഒരുക്കിയ ചിത്രത്തിന് മികച്ച എഡിറ്റിംഗിനുള്ള പുരസ്കാരവും ലഭിച്ചു. ഒരു കൊച്ചു പെണ്‍കുട്ടിയുടെ വലിയ സ്വപ്നത്തിലേക്കുള്ള യാത്രയുടെ കഥയാണ് ചിത്രം പറയുന്നത്. പത്തുവയസുകാരി റോക്ക് റോക്ക് ബാൻഡ് ഉണ്ടാക്കാൻ നടത്തുന്ന ശ്രമം ചിത്രീകരിച്ച വില്ലേജ് റോക്ക് സ്റ്റാറിനെ ജൂറി മികച്ച ചിത്രമായി തെരഞ്ഞെടുക്കുകയായിരുന്നു.
ദ് പാന്തി സ്റ്റോറി എന്ന ചിത്രം മികച്ച പരിസ്ഥിതി സിനിമയ്ക്കുള്ള പുരസ്കാരം നേടി. ഗിരിധർ ഝാ മികച്ച സിനിമ നിരൂപകനുള്ള പുരസ്കാരം സ്വന്തമാക്കി. സംഗീത വിഭാഗത്തിൽ എ.ആർ.റഹ്മാന് രണ്ടു പുരസ്കാരങ്ങൾ ലഭിച്ചത് ശ്രദ്ധേയമായി. മികച്ച സംഗീത സംവിധായകൻ, മികച്ച പശ്ചാത്തല സംഗീതം എന്നീ പുരസ്കാരങ്ങളാണ് റഹ്മാനെ തേടിയെത്തിയത്. മണിരത്നം സംവിധാനം ചെയ്ത കാട്രു വെളിയിടെ എന്ന തമിഴ് ചിത്രത്തിനായി ഒരുക്കിയ ഗാനങ്ങൾക്കാണ് മികച്ച സംഗീത സംവിധായകനുള്ള പുരസ്കാരം റഹ്മാന് ലഭിച്ചത്. മോം എന്ന ചിത്രത്തിനായി ഒരുക്കിയ പശ്ചാത്തല സംഗീതവും റഹ്മാന് പുരസ്കാരം സമ്മാനിച്ചു.
കഴിഞ്ഞ വർഷത്തെ ശ്രദ്ധേയ ചിത്രങ്ങളിൽ ഒന്നായ ബാഹുബലി ദ് കണ്‍ക്ലൂഷനാണ് മികച്ച ജനപ്രിയ ചിത്രത്തിനുള്ള പുരസ്കാരം നേടിയത്. മികച്ച സംഘട്ടനം, വിഷ്വൽ ഇഫക്ട്സ് എന്നീ വിഭാഗങ്ങൾക്കുള്ള പുരസ്കാരവും ബാഹുബലി സ്വന്തമാക്കി. റഹ്മാന്‍റെ ഒരുക്കിയ കാട്രു വെളിയിടെ എന്ന ചിത്രത്തിലെ ഗാനം ആലപിച്ച സാഷ തിരുപ്പതിയാണ് മികച്ച ഗായിക.
മികച്ച ഹിന്ദി ചിത്രം (ന്യൂട്ടണ്‍), മികച്ച തമിഴ് ചിത്രം (ടു ലെറ്റ്), മികച്ച മറാഠി ചിത്രം (മോർഖ്യ), മികച്ച ഒറിയ ചിത്രം (ഹലോ ആർസി) എന്നിവയും പുരസ്കാരത്തിന് അർഹമായി. ശേഖർ കപൂർ അധ്യക്ഷനായ പത്തംഗ ജൂറിയാണ് അവാർഡുകൾ നിശ്ചയിച്ചത്. മലയാളത്തിൽ നിന്ന് 15 ചിത്രങ്ങളാണ് പുരസ്കാര പട്ടികയിൽ ഉണ്ടായിരുന്നത്.
മികച്ച സിനിമ- വില്ലേജ് റോക്ക് സ്റ്റാര്‍സ്
മികച്ച സംവിധായകന്‍- ജയരാജ്(ഭയാനകം)
മികച്ച നടി- ശ്രീദേവി(മോം)
മികച്ച നടന്‍- റിഥി സെന്‍ (നഗര്‍ കീര്‍ത്തന്‍)
മികച്ച സംഗീത സംവിധായകന്‍- എ.ആര്‍ റഹ്മാന് (കാട്ര് വെളിയിടൈ)
മികച്ച പശ്ചാത്തലസംഗീതം- എ.ആര്‍ റഹ്മാന് (മോം)
മികച്ച ഗായകന്‍- കെ.ജെ. യേശുദാസ് (പോയ് മറഞ്ഞ കാലം- വിശ്വാസപൂര്‍വ്വം മന്‍സൂര്‍)
മികച്ച ഗായിക- സാഷാ തിരുപ്പതി (കാട്ര് വെളിയിടൈ)
മികച്ച ഗാനരചയിതാവ്- ജയന്‍ പ്രദാന്‍
മികച്ച തിരക്കഥ- സജീവ് പാഴൂര്‍ (തൊണ്ടിമുതലും ദൃക്‌സാക്ഷിയും)
മികച്ച അവലംബിത തിരക്കഥ- ജയരാജ് (ഭയാനകം)
മികച്ച ക്യാമറാമാന്‍- നിഖില്‍ എസ് പ്രവീണ്‍ (ഭയാനകം)
മികച്ച സഹനടി- ദിവ്യ ദത്ത (ഇരാദ)
മികച്ച സഹനടന്‍- ഫഹദ് ഫാസില്‍
മികച്ച പ്രൊഡക്ഷന്‍ ഡിസൈന്‍- സന്തോഷ് രാമന്‍ (ടേക്ക് ഓഫ്)
മികച്ച എഡിറ്റിംഗ്- റിമ ദാസ് (വില്ലേജ് റോക്ക് സ്റ്റാര്‍)
മികച്ച വിഷ്വല്‍ എഫക്ട്‌സ്- ബാഹുബലി 2
മികച്ച കൊറിയോഗ്രഫി- ഗണേഷ് ആചാര്യ
മികച്ച സാമൂഹിക പ്രതിബദ്ധതയുള്ള ചിത്രം- ആളൊരുക്കം
മികച്ച ദേശീയോദ്ഗ്രഥന ചിത്രം- ധപെ
മികച്ച മലയാള സിനിമ- തൊണ്ടിമുതലും ദൃക്‌സാക്ഷിയും (ദിലീഷ് പോത്തന്‍)
മികച്ച ബംഗാളി ഫിലിം- മയൂരക്ഷി
മികച്ച ഹിന്ദി ചിത്രം- ന്യൂട്ടണ്‍
മികച്ച തമിഴ് ചിത്രം- ടു ലെറ്റ്
മികച്ച തെലുഗ് ചിത്രം- ഗാസി അറ്റാക്ക്‌
മികച്ച നോണ്‍ഫീച്ചര്‍ ഫിലിം- വാട്ടര്‍ ബേബി
മികച്ച കഥേതര വിഭാഗം സിനിമ- സ്ലേവ് ജെനസിസ്(അനീസ് കെ.എം.)
മികച്ച നിരൂപകന്‍- ഗിരിര്‍ ഝാ
പ്രത്യേക ജൂറി പരാമര്‍ശം നേടിയ ചിത്രം- (മറാത്തി ചിത്രം) മോര്‍ഹിയ ഒഡീഷ ചിത്രം (മനേനി)
പാര്‍വതി(ടേക്ക് ഓഫ്) യ്ക്കും പങ്കജ് ത്രിപാഠി(ന്യൂട്ടണ്‍)ക്കും പ്രത്യേക ജൂറി പരാമര്‍ശം
