- Thursday, November 28, 2024
- A biweekly newspaper published from philadelphia , pa.
ലണ്ടന്‍: ഇംഗ്ലീഷ് പ്രീമിയര്‍ ലീഗ് ഫുട്ബോളില്‍ കിരീടമുറപ്പിച്ച മാഞ്ചെസ്റ്റര്‍ സിറ്റി ഹഡേഴ്സ്ഫീല്‍ഡ് ടൗണിനോട് ഗോള്‍ രഹിത സമനില (0-0) വഴങ്ങി. സിറ്റിയുടെ കിരീടധാരണച്ചടങ്ങ് മത്സരശേഷം എത്തിഹാദ് സ്റ്റേഡിയത്തില്‍ നടന്നു.
ഹഡേഴ്‌സ് ഫീല്‍ഡിനോട് സമനിലവഴങ്ങിയെങ്കിലും ലീഗില്‍ സീസണില്‍ 100 പോയന്റ് എന്ന നാഴികക്കല്ല് സിറ്റിക്ക് ഇപ്പോഴും കൈയെത്തും ദൂരത്താണ്. ഇതിനായി ശേഷിക്കുന്ന രണ്ട് മത്സരവും ജയിക്കണമെന്ന് മാത്രം. 36 കളിയില്‍ 94 പോയന്റാണ് സിറ്റിയുടെ സമ്ബാദ്യം.
അതോടൊപ്പം ഒരു സീസണില്‍ ഏറ്റവും കൂടുതല്‍ ഗോള്‍ നേടുകയെന്ന ചെല്‍സിയുടെ റെക്കോഡ് മറികടക്കാനും സിറ്റിക്ക് അവസരമുണ്ട്. അടുത്ത രണ്ടുകളിയില്‍ രണ്ടുഗോളടിച്ചാല്‍ മതി ഈ ലക്ഷ്യത്തിലെത്താന്‍. സീസണില്‍ ഇതുവരെ സിറ്റി 102 ഗോള്‍ നേടിയിട്ടുണ്ട്.
ഞായറാഴ്ച മറ്റു മത്സരങ്ങളില്‍ ചെല്‍സി ഏകപക്ഷീയമായ ഒരു ഗോളിന് ലിവര്‍പൂളിനെയും ആഴ്സനല്‍ (5-0) ബേണ്‍ലിയെയും തോല്പിച്ചു. പ്രീമിയര്‍ ലീഗില്‍ ശനിയാഴ്ച വെസ്റ്റ് ബ്രോംവിച്ച്‌ ആല്‍ബിയോണ്‍ ഏകപക്ഷീയമായ ഒരുഗോളിന് ടോട്ടനത്തിനെ അട്ടിമറിച്ചു.
