- Thursday, November 28, 2024
- A biweekly newspaper published from philadelphia , pa.
പ്രമുഖ പ്രവാസി വ്യവസായിയും സംസ്ഥാന സര്‍ക്കാരിന്റെ നോര്‍ക്ക വൈസ്‌ ചെയര്‍മാനുമായ പത്മശ്രീ സി.കെ. മേനോന്‍ (72) നിര്യാതനായി. ചെന്നൈയിലെ അപ്പോളോ ആശുപത്രിയില്‍ ന്യൂമോണിയയെ തുടര്‍ന്നായിരുന്നു അന്ത്യം. തൃശൂര്‍ ചേരില്‍ കൃഷ്‌ണ മേനോന്‍ എന്ന സി.കെ. മേനോന്‍ ഖത്തര്‍ ആസ്ഥാനമായ ബഹ്‌സാദ്‌ ഗ്രൂപ്‌ വ്യവസായ ശൃംഖലയുടെ ചെയര്‍മാനും മാനേജിങ്‌ ഡയറക്ടറുമാണ്‌.
ഒരുവര്‍ഷമായി അസുഖത്തെ തുടര്‍ന്നു ചികിത്സയിലായിരുന്നു. എറണാകുളത്തെ ആസ്റ്റര്‍ ആശുപത്രിയില്‍ രണ്ടാഴ്‌ചയായി കഴിഞ്ഞ അദ്ദേഹത്തെ അസുഖം മൂര്‍ച്ഛിച്ചതിനെ തുടര്‍ന്ന്‌ ഒരാഴ്‌ച മുന്‍പ്‌ ചെന്നൈയിലെ അപ്പോളോ ആശുപത്രിയിലേക്കു മാറ്റുകയായിരുന്നു.
തൃശൂര്‍ പാട്ടുരായ്‌ക്കല്‍ ചേരില്‍ കാര്‍ത്ത്യായിനി അമ്മയുടെയും പുളിയങ്കോട്ട്‌ നാരായണന്‍ നായരുടെയും മകനാണ്‌ സി.കെ. മേനോന്‍.
ഭാര്യ: ജയശ്രീമേനോന്‍. മക്കള്‍: അഞ്‌ജന മേനോന്‍ (ദോഹ), ശ്രീരഞ്‌ജിനി മേനോന്‍ (യുകെ), ജയകൃഷ്‌ണന്‍ മേനോന്‍ (എക്‌സിക്യൂട്ടീവ്‌ ഡയറക്ടര്‍, ബഹ്‌ദാദ്‌ ഗ്രൂപ്പ്‌, ഖത്തര്‍)മരുമക്കള്‍: ഡോ. ആനന്ദ്‌ (ദോഹ), ഡോ. റിതീഷ്‌ (യുകെ), ശില്‍പ (ദോഹ).
