- Thursday, November 28, 2024
- A biweekly newspaper published from philadelphia , pa.
ഡാലസ് : ഡാലസിലെ ഏഴ് ഓർത്തോഡോക്സ് ഇടവകകളുടെ സംയുക്ത ആഭിമുഖ്യത്തിൽ നടത്തപ്പെടുന്ന അഞ്ചാമത് ഓർത്തഡോക്സ് കൺവെൻഷന്റെ ഒരുക്കങ്ങൾ പൂർത്തിയായി. മാർച്ച് 16, 17, 18 (വെള്ളി, ശനി, ഞായർ) ദിവസങ്ങളിൽ ഇർവിങ് സെന്റ്. ജോർജ് ദേവാലയത്തിൽ വച്ച് (1627 E Shady Grove Rd, Irving Texas 75060) നടക്കുന്ന കൺവെൻഷനിൽ പ്രസിദ്ധ കൺവെൻഷൻ പ്രസംഗകനും ഓർത്തോഡോക്സ് വൈദിക സെമിനാരി പ്രൊഫസറും അഖില മലങ്കര ഓർത്തഡോക്സ് വൈദിക സംഘം സെക്രട്ടറിയുമായ റവ.ഫാ .തോമസ് വർഗ്ഗീസ് (സജി അമയിൽ അച്ചൻ) മുഖ്യ പ്രസംഗകൻ ആയിരിക്കും. എല്ലാ ദിവസവും വൈകുന്നേരം സന്ധ്യാനമസ്കാരത്തോടു കൂടി ആരംഭിക്കുന്ന യോഗത്തിൽ ഡാളസിലെ എല്ലാ വൈദികരും സംബന്ധിക്കുന്നതാണ്.
വെള്ളിയാഴ്ച ഏഴു മണിക്കും ശനി ഞായർ ദിവസങ്ങളിൽ ആറര മണിക്കും സന്ധ്യാ നമസ്കാരം ആരംഭിക്കും. ഡാളസിലെ എല്ലാ ഇടവകകളിൽ നിന്നുമുള്ള ഗായകസംഘ അംഗങ്ങൾ ഉൾപ്പെടുന്ന സംയുക്ത ഗായകസംഘം ഗാനങ്ങൾ ആലപിക്കും. കൺവെൻഷൻ കൺവീനർ ആയ ഇർവിങ് സെന്റ്. ജോർജ് ഇടവക വികാരി റവ.ഫാ. തമ്പാൻ വർഗ്ഗീസിന്റെ നേതൃത്വത്തിൽ ഗാർലാൻഡ് സെന്റ് ഗ്രീഗോറിയോസ്, ഫാർമേഴ്സ് ബ്രാഞ്ച് സെന്റ്. മേരീസ് വലിയപള്ളി, കരോൾട്ടൻ സെന്റ്. മേരീസ്, ഡാളസ് സെന്റ്. തോമസ്, പ്ലേനോ സെന്റ് പോൾസ്, ഡാളസ് സെന്റ്. ജെയിംസ് മിഷൻ ചർച്ച് എന്നീ ഇടവകകളിലെ വികാരിമാരും, ഡാളസ് മെട്രോപ്ലെക്സിൽ ഉള്ള മറ്റു വൈദികരും, ഇടവക പ്രതിനിധികളും, ആത്മീയ സംഘടനാ ഭാരവാഹികളും ഉൾപ്പെടുന്ന സംയുക്ത കമ്മറ്റി പരിപാടികളുടെ നടത്തിപ്പിനുള്ള ക്രമീകരണങ്ങൾ ചെയ്ത് വരുന്നു.
ആത്മീയ ഉണർവ് നൽകുന്ന ഈ ത്രിദിന ദൈവ വചന ഘോഷണ സമ്മേളനത്തിൽ സംബന്ധിച്ച് ഈ നോമ്പുകാലം അനുതാപത്തിന്റെയും ആത്മ സമർപ്പണത്തിന്റെയും അവസരം ആക്കിതീർക്കുവാൻ ഡാലസിലെ എല്ലാ ക്രിസ്തിയ വിശ്വാസികളെയും സ്വാഗതം ചെയ്യുന്നതായി സംഘാടകർ അറിയിക്കുന്നു.
കൂടുതൽ വിവരങ്ങൾക്ക്:
റവ.ഫാ. തമ്പാൻ വർഗ്ഗീസ് (കൺവീനർ) 469 583 5914
അലക്സ് വർഗ്ഗീസ്: (സെക്രട്ടറി) 214 282 4238
സ്മിതാ ഗീവർഗ്ഗീസ്: (ട്രഷറാർ) 214 662 7070
