- Thursday, November 28, 2024
- A biweekly newspaper published from philadelphia , pa.
പുണെ: സെമിഫൈനലിലേക്ക് മുന്നേറാന്‍ ഏറെ നിര്‍ണായകമായ മത്സരത്തില്‍ പുണെയ്‌ക്കെതിരെ അവരുടെ തട്ടകത്തില്‍ കേരള ബ്ലാസ്റ്റേഴ്സിന് തകര്‍പ്പന്‍ വിജയം. ഇരുടീമും ഓരോ ഗോള്‍ വീതം നേടി സമനിലയിലേക്ക് നീങ്ങിയിരുന്ന കളിയില്‍ ഇഞ്ചുറി ടൈമില്‍ മലയാളി താരം സികെ വിനീത് നേടിയ ഗോളാണ് ബ്ലാസ്റ്റേഴ്സിന് വിജയം സമ്മാനിച്ചത്. ജയത്തോടെ 14 മത്സരങ്ങളില്‍ നിന്ന് 20 പോയന്റുമായി ബ്ലാസ്റ്റേഴ്സ് പോയന്റ് പട്ടികയില്‍ അഞ്ചാം സ്ഥാനത്തേക്ക് മുന്നേറി. ഇനിയുള്ള മത്സരങ്ങളിലും മികച്ച പ്രകടനം പുറത്തെടുത്താല്‍ ബ്ലാസ്റ്റേഴ്സിന് ഐഎസ്എല്‍ നാലാം സീസണ്‍ സെമി ഉറപ്പിക്കാം.
ബ്ലാസ്റ്റേഴ്സിനായി ജാക്കിചന്ദ് സിങ്ങാണ് (57) ആദ്യ ഗോൾ േനടിയത്. ഗോൾകീപ്പർ സുഭാശിഷ് റോയിയുടെ പിഴവിൽനിന്ന് ലഭിച്ച പെനൽറ്റി മുതലെടുത്ത എമിലിയാനോ അൽഫാരോ 78–ാം മിനിറ്റിൽ പുണെയെ ഒപ്പമെത്തിച്ചു. ഇതിനു പിന്നാലെയായിരുന്നു ഇൻജുറി ടൈമിന്റെ അവസാന മിനിറ്റിൽ വിനീത് ബ്ലാസ്റ്റേഴ്സിന്റെ രക്ഷകനായത്.
മൽസരത്തിന്റെ ആദ്യ പകുതിയിൽ ഇയാൻ ഹ്യൂമിനും സി.കെ.വിനീതിനും അവസരങ്ങൾ പലതു ലഭിച്ചെങ്കിലും ഒന്നും ഗോളിലെത്തിക്കാനായില്ല. കളിയുടെ ആദ്യ 10 മിനിറ്റിൽ ശക്തമായ ആക്രമണവുമായി പുണെ ഗോൾമുഖം വിറപ്പിച്ചാണു ബ്ലാസ്റ്റേഴ്സ് തുടങ്ങിയത്. ഫിനിഷിങ്ങിലെ പോരായ്മ തുടക്കത്തിൽ തന്നെ ബ്ലാസ്റ്റേഴ്സിനു കല്ലുകടിയായി. പുണെ ഗോളിയുടെ പിഴവിൽ ലഭിച്ച സുവർണാവസരവും ബ്ലാസ്റ്റേഴ്സ് പാഴാക്കി. പന്തു പിടിച്ചെടുത്ത ഹ്യൂം സി.കെ.വിനീതിനു മറിച്ചുകൊടുത്തെങ്കിലും ഗോൾ നേടാനായില്ല
