- Thursday, November 28, 2024
- A biweekly newspaper published from philadelphia , pa.
അതിശക്തമായ കഥാപാത്രങ്ങളിലൂടെ മലയാള സിനിമയിലേയ്‌ക്ക്‌ തിരിച്ചു വരവ്‌ നടത്തിയിട്ടും മെഗാസ്റ്റാര്‍ മമ്മൂട്ടിക്കൊപ്പം അന്നും ഇന്നും മഞ്‌ജുവാര്യര്‍ അഭിനയിച്ചിട്ടില്ല. ആരാധകര്‍ ഏറെക്കാലമായി ചോദിക്കുന്ന ചോദ്യമാണത്‌. മഞ്‌ജുവിനെയും മമ്മൂട്ടിയെയും നായികാനായകന്മാരായി വെള്ളിത്തിരയില്‍ എന്ന്‌ കാണുമെന്ന്‌.
ഇത്രയും കാലമായി മലയാളത്തിലെ പഴയതും പുതിയതുമായ മിക്ക സൂപ്പര്‍സ്റ്റാറുകള്‍ക്കൊപ്പവും മഞ്‌ജു അഭിനയിച്ചു കഴിഞ്ഞു. പൃഥിരാജ്‌ സംവിധാനം ചെയ്‌ത്‌ മോഹന്‍ലാല്‍ നായകനായ ലൂസിഫര്‍ കൂടാതെ സന്തോഷ്‌ ശിവന്‍ സംവിധാനം ചെയ്‌ത ജാക്ക്‌ ആന്‍ഡ്‌ ജില്‍ ആണ്‌ റിലീസിനെത്താനിരിക്കുന്ന മറ്റൊരു മഞ്‌ജു വാര്യര്‍ ചിത്രം. മോഹന്‍ലാല്‍ പ്രിയദര്‍ശന്‍ ടീമിന്റെ കുഞ്ഞാലി മരയ്‌ക്കാര്‍ എന്ന സിനിമയിലും മുഖ്യ കഥാപാത്രമായി മഞ്‌ജു വാര്യര്‍ എത്തുന്നുണ്ട്‌.
ആരാധകരെപ്പോലെത്തന്നെ മമ്മൂട്ടിയോടൊത്തുള്ള സിനിമക്കായി താനും കാത്തിരിക്കുകയാണെന്നാണ്‌ ഇക്കാര്യത്തെക്കുറിച്ച്‌ മഞ്‌ജുവിന്റെ പ്രതികരണം. 'പണ്ടും മമ്മൂക്കയോടൊപ്പം അഭിനയിക്കാന്‍ വലിയ താല്‍പ്പര്യമായിരുന്നു. അന്നത്‌ നടന്നില്ല. തിരിച്ചുവന്ന ശേഷവും ഏറ്റവും ആഗ്രഹത്തോടെ കാത്തിരിക്കുകയാണ്‌ മമ്മൂക്ക എന്ന മഹാനടന്റെയൊപ്പം ഒരു ഫ്രെയിമില്‍ നില്‍ക്കാന്‍' മഞ്‌ജു പറയുന്നു.
നേരത്തെ മമ്മൂട്ടിക്കൊപ്പം ജോഷി ചിത്രത്തില്‍ മഞ്‌ജു എത്തുമെന്ന്‌ റിപ്പോര്‍ട്ടുകള്‍ ഉണ്ടായിരുന്നു. എന്നാല്‍ പിന്നീട്‌ മമ്മൂട്ടി തന്നെ ഇക്കാര്യം നിഷേധിച്ച്‌ രംഗത്തെത്തിയിരുന്നു.
