- Thursday, November 28, 2024
- A biweekly newspaper published from philadelphia , pa.
പി പി ചെറിയാന്‍
വിശുദ്ധ ഗ്രീഗോറിയോസ്‌ തിരുമേനിയുടെ ഓര്‍മ്മപ്പെരുന്നാള്‍ ആഘോഷങ്ങള്‍ നവംബര്‍ 2, 3 തീയതികളില്‍ സൈന്റ്‌ ഗ്രീഗോറിയോസ്‌ ഓര്‍ത്തഡോക്‌സ്‌ ഇടവക പള്ളിയില്‍ വെച്ച്‌ നടന്നു. ഈ പെരുന്നാള്‍, ഇടവകയുടെ മധ്യസ്ഥനായ വിശുദ്ധ ഗ്രീഗോറിയോസ്‌ തിരുമേനിയുടെ ഓര്‍മ്മപ്പെരുന്നാള്‍ എന്നതിനുപരി ഗ്രീഗോറിയോസ്‌ പള്ളിയുടെ 8-ാം പിറന്നാള്‍ കൂടിയാണ്‌.
സെന്റ് ഗ്രീഗോറിയോസ്‌ ചര്‍ച്ച്‌ ഓഫ്‌ കന്‍സാസ്‌ സിറ്റി മലങ്കര ഓര്‍ത്തഡോക്‌സ്‌ സുറിയാനി സഭയുടെ അമേരിക്കന്‍ സൗത്ത്‌ വെസ്റ്റ്‌ ഭദ്രാസനത്തിന്റെ ഭാഗമാണ്‌ .ഈ പെരുന്നാളിന്‌ പുതുതായി പട്ടമേറ്റ നോര്‍ത്ത്‌ ഈസ്റ്റ്‌ ഭദ്രാസനത്തിലെ ഫാ. തോമസ്‌ പി തോമസ്‌ പ്രധാന കാര്‍മികത്വവും പള്ളി വികാരി ഫാ. ഡിജു സഖറിയ സഹ കാര്‍മ്മികത്വവും വഹിച്ചു. ഫാ. തോമസ്‌ പി തോമസ്‌ നോര്‍ത്ത്‌ ഈസ്റ്റ്‌ ഭദ്രാസനത്തിന്റെ സണ്‍ഡേ സ്‌കൂള്‍ ഡയറക്ടര്‍ കൂടിയാണ്‌.
പെരുന്നാള്‍ ആഘോഷങ്ങള്‍ നവംബര്‍ 2-ാം തിയതി ശനിയാഴ്‌ച ആറു മണിക്ക്‌ കൊടിയേറിയതിനോടനുബന്ധിച്ചു സന്ധ്യാപ്രാര്‍ത്ഥനയും നടന്നു. ഭക്തിനിര്‍ഭരമായ സന്ദേശം ഫാ. തോമസ്‌ പി തോമസ്‌ അച്ചന്‍ നല്‍കി. പെരുന്നാള്‍ ദിവസമായ നവംബര്‍ 3ന്‌ ഞായറാഴ്‌ച ഫാ. തോമസ്‌ പി തോമസ്‌ വിശുദ്ധ കുര്‍ബാന അര്‍പ്പിച്ചു. പള്ളിയുടെ വികാരി ഡിജു സഖറിയ സഹകാര്‍മികത്വം വഹിച്ചു. വിശുദ്ധ കുര്‍ബാനക്ക്‌ ശേഷം വിശുദ്ധ ഗ്രീഗോറിയോസ്‌ തിരുമേനിയുടെ ഓര്‍മ്മസൂചകമായി പള്ളിക്ക്‌ പ്രദക്ഷിണമായി പെരുന്നാള്‍ ഘോഷയാത്ര നടന്നു. കൊടിതോരണങ്ങളും മുത്തുക്കുടകളും, ഗാനങ്ങളുമായി ഇടവക അംഗങ്ങള്‍ ഘോഷയാത്രയില്‍ പങ്കെടുത്തു.
