- Thursday, November 28, 2024
- A biweekly newspaper published from philadelphia , pa.
യുഡിഎഫ്‌ ഐതിഹാസികമായ വിജയം നേടി അധികാരത്തില്‍ തിരിച്ചുവരുമെന്ന്‌ പ്രതിപക്ഷ നേതാവ്‌ രമേശ്‌ ചെന്നിത്തല. കേരളത്തിലുടനീളം വോട്ടര്‍മാരില്‍ കണ്ട ആവേശം അതിന്റെ വ്യക്തമായ സൂചനയാണ്‌ നല്‍കുന്നത്‌. അഞ്ചു വര്‍ഷം കൊണ്ടു കേരളത്തെ തകര്‍ത്ത്‌ തരിപ്പണമാക്കിയ ഇടതുമുന്നണി സര്‍ക്കാരിനെതിരെ ജനങ്ങള്‍ ഒറ്റക്കെട്ടായി വിധി എഴുതുന്നതാണ്‌ ദൃശ്യമായത്‌. പ്രതിപക്ഷം ഒന്നൊന്നായി പുറത്തു കൊണ്ടു വന്ന ഇടതു സര്‍ക്കാരിന്റെ അഴിമതികള്‍ ഇടതു പക്ഷത്തിന്റെ തനിനിറം ജനങ്ങള്‍ക്ക്‌ കാട്ടിക്കൊടുത്തു. പിആര്‍ എജന്‍സികളുടെ സഹായത്തോടെ നടത്തിയ പ്രചാരണ കോലാഹലങ്ങളൊന്നും ഇടതു മുന്നണിയ്‌ക്കു രക്ഷയായില്ല. ശബരിമലയിലെ ആചാരങ്ങളും വിശ്വാസങ്ങളും ചവിട്ടി മെതിച്ച സര്‍ക്കാര്‍ ഈ തിരഞ്ഞെടുപ്പ്‌ കാലത്തും ജനങ്ങളെ കബളിപ്പിക്കാനാണു നോക്കിയതെന്നു ഭക്തര്‍ തിരിച്ചറിഞ്ഞു. പരാജയ ഭീതി പൂണ്ട ഇടതു മുന്നണി സംസ്ഥാനത്ത്‌ പല ഭാഗത്തും യുഡിഎഫ്‌ പ്രവര്‍ത്തകര്‍ക്ക്‌ നേരെ അക്രമം അഴിച്ചു വിട്ടു. നിരവധി യുഡിഎഫ്‌ പ്രവര്‍ത്തകര്‍ക്കാണു പരുക്കേറ്റത്‌. ഇടതു മുന്നണി എന്തു പ്രകോപനമുണ്ടാക്കിയാലും യുഡിഎഫ്‌ പ്രവര്‍ത്തകര്‍ സംയമനം വിടരുതെന്ന്‌ രമേശ്‌ ചെന്നിത്തല അഭ്യര്‍ത്ഥിച്ചു.
വ്യാപകമായി കള്ളവോട്ട്‌ ചെയ്യുന്നതിന്‌ വോട്ടര്‍പട്ടികയില്‍ സിപിഎമ്മും ഇടതു മുന്നണിയും നടത്തിയ കൃത്രിമം യുഡിഎഫ്‌ പിടികൂടുകയും വോട്ടെടുപ്പ്‌ ദിനത്തില്‍ യുഡിഎഫ്‌ പ്രവര്‍ത്തകര്‍ ജാഗ്രത പാലിക്കുകയും ചെയ്‌തതിനാല്‍ കള്ളവോട്ട്‌ വലിയ തോതില്‍ തടയുന്നതിന്‌ കഴിഞ്ഞിട്ടുണ്ട്‌. തിരഞ്ഞെടുപ്പില്‍ യുഡിഎഫിന്‌ അനുകൂലമായി വോട്ട്‌ ചെയ്‌ത എല്ലാ വിഭാഗം ജനങ്ങള്‍ക്കും രമേശ്‌ ചെന്നിത്തല നന്ദി രേഖപ്പെടുത്തി.
