- Thursday, November 28, 2024
- A biweekly newspaper published from philadelphia , pa.
കത്തിക്കയറുന്ന രാഷ്‌ട്രീയ പ്രചാരണത്തിനിടെ തിരുവനന്തപുരം മണ്ഡലത്തിലെ കോണ്‍ഗ്രസ്‌ പ്രചാരണത്തില്‍ വീഴ്‌ചയുണ്ടെന്നത്‌ മാധ്യമസൃഷ്ടിയാണെന്ന്‌ വരെ ഒരവസരത്തില്‍ പറയേണ്ടിവന്നിരിക്കുന്നു ഉമ്മന്‍ ചാണ്ടിക്ക്‌. ഇതുസംബന്ധിച്ച്‌ ശശി തരൂര്‍ ആര്‍ക്കും പരാതി നല്‍കിയിട്ടില്ലെന്നും അദ്ദേഹം പൂര്‍ണ സംതൃപ്‌തവാന്‍ ആണെന്നുമാണ്‌ ഉമ്മന്‍ ചാണ്ടി നിലപാട്‌ വ്യക്തമാക്കിയത്‌. കോണ്‍ഗ്രസ്‌ ഒറ്റക്കെട്ടായി പ്രവര്‍ത്തിക്കുകയാണെന്നും തരൂരിന്റെ വിജയം 100 ശതമാനം ഉറപ്പ്‌ വരുത്തി തന്നെയാണ്‌ മുന്നോട്ട്‌ പോകുന്നതെന്നും ഫലം വരുമ്പോള്‍ നിങ്ങള്‍ക്കത്‌ കാണാമെന്നുംകൂടെ ഉമ്മന്‍ചാണ്ടി പറഞ്ഞുവെച്ചു.
തിരുവനന്തപുരത്ത്‌ ശശി തരൂരിന്‌ ഒരു തരത്തിലുമുള്ള ഭീഷണിയുമില്ല. വന്‍ ഭൂരിപക്ഷത്തില്‍ തന്നെ അവിടെ ജയിക്കും. കോഴിക്കോട്‌ ചിട്ടയായ പ്രവര്‍ത്തനം നടത്തിയ ശേഷമാണ്‌ വയനാട്ടില്‍ സ്ഥാനാര്‍ഥി നിര്‍ണയമുണ്ടായത്‌. ഏതെങ്കിലും തരത്തില്‍ സ്ഥാനാര്‍ഥിക്ക്‌ പരാതിയുണ്ടെങ്കില്‍ അത്‌ പരിഹരിക്കും. വയനാട്‌ കേന്ദ്രീകരിച്ച്‌ പ്രവര്‍ത്തിക്കുന്നത്‌ കൊണ്ട്‌ എം.കെ.രാഘവനൊപ്പം പ്രവര്‍ത്തിക്കാന്‍ നേതാക്കളെ കിട്ടുന്നില്ലെന്ന പരാതി സംബന്ധിച്ച ചോദ്യത്തിന്‌ മറുപടി പറയുകയായിരുന്നു ഉമ്മന്‍ ചാണ്ടി.
വയനാട്ടിലേക്ക്‌ പാര്‍ട്ടി നിയോഗിച്ച ആളുകള്‍ മാത്രമെ പ്രചാരണത്തിന്‌ പോകാവൂ എന്ന്‌ കര്‍ശന നിര്‍ദേശം നല്‍കിയിട്ടുണ്ടെന്നും അത്‌ അക്ഷരംപ്രതി പാലിക്കുന്നുണ്ടെന്നും സാധാരണ അവസാന പത്ത്‌ ദിവസങ്ങളിലാണ്‌ യുഡിഎഫിന്റെ പ്രചാരണം ചൂട്‌ പിടിക്കാറുള്ളതെന്നും അദ്ദേഹം പറഞ്ഞു.
